Ka nisur sot në Tiranë samiti i Brdo-Brijunit, i organizuar nga Presidenti Ilir Meta ku janë mbledhur edhe lidërat kryesorë të Ballkanit dhe përfaqësues të lartë të Europës. Me ftesën edhe të Presidentes së Kroacisë, Kolinda Grabar-Kitarović dhe të Presidentit të Sllovenisë, Borut Pahor, në Samitin e Tiranës, do të marrin pjesë tre Anëtarët e Kryesisë së Presidencës së Bosnje-Hercegovinës, Milorad Dodik, Šefik Džaferović dhe Željko Komšić, Presidenti i Kosovës, Hashim Thaçi, Presidenti i Malit të Zi, Milo Đukanović, Presidenti i Maqedonisë, Gjorge Ivanov, si dhe Presidenti i Serbisë, Aleksandar Vučić.
Por duket se në Tiranë janë pritur me protesta si Vuçiç ashtu edhe presidenti i Bosnje-Hercegovinës Milorad Dodik. Qendra Lëvizja Vetëvendosja ka organizuar një protestë, duke thënë se dy presidentët janë ‘non-grata’ në Tiranë. Me parulla në duar, protestuesit shkruanin se liderët duhet të thonë më fal përpara se të thojnë mirëdita në Tiranë. Megjithatë policia ka mundur të mbajë nën kontrollë turmën e mbledhur në bulevard, pranë hotelit ku po zhvillohet samiti.
